MIMBAR TANEAK JANG

Puaso Ramadhan & Skula Idup

2011-08-23T19:38:00.001-07:00

Bulen puaso ade ba madrasah,skula pnan te belajea dau hal tentang kehidupan yo..Supayo ite lebiak siap madep idup,supayo ite ade wawasan,supayo ite nam kemliak uak moi muko,supayo ite coa terjebak lem utung sesaat,tetapi menea krugai lai lem jako panyang.

Jano bae pelajaran dapet ite menea ijai pegong lem kemrejo ibadat puaso bulen Ramadhan yo..
Pertamo ade ba,majea ite ijai tun tegea ngen sabar..Neak lem zaman pnuak persaingan tajem yo,ade tuntutan magea ite untuk trus berusaho serto dorangan sabar lem maneu kehidupan yo.

Kareno zaman yo,ade ba zaman dau pilihan..lok gacang kayo mliut tun,muk hok tun,lok gacang kayo kemrejo hal-hal do nyato nyato haram..Lok dapet kedudukan,kemrejo suep menyuep..zaman dau pilihan,do haram cigai tun dulai igai. Mako oleh kareno o,bulen Ramadhan majea ite untuk sabar,serto tegea lem maneu idup...Lem bulen puaso,upan halal bae ite coa buliak muk,jano igai do haram. Ite saat yo masuk zaman sulit,tapi neak segai luyen ite kemliak,mudeak bae caci milyaran kunei pemriteak untuk hal-hal do coa gen kaitan ne ngen kepentingan masyarakat. Perasaan mengiak,jengik serto muak ngen tindakan pembodohan awei o pasti traso lem atei masyarakat..Ite kemliak uyo tukang maling hok rakyat tameak bae mrajolilo neak negerai te yo,de saleak ijai benea,de benea ijai saleak..Ite idup neak tengeak negrai penuak ngen tun saling sangkliut. Mako lem keadan awei zaman uyo,stabilitas temperatur batin harus benea-benea jnago..Ramadhan majea ite untuk sabar serto tegea lem madep idup yo,kunyau nyemen mlilit tnei..Kunyau aus mcit kagen,amen ati sapei waktau buko..jibeak kemcep upan,jibeak menem bioa...Puaso menea ite mlatih sipet sabar.

Ite yo amen ite lok didik mnung meker,ade ba bangso bi terbiaso ngen idup saro..bi biaso ngen keadaan spit..Ekonomi sulit,maso depan generasi penerus seakan-akan neak biding tpok uyo..tingea mot us ne igai. Kesungguhan lem usaho serto ni'ing ngen sipet sabar,optimis kemliak maso teko..Amen bi awei o,insya Allah dalen brasea ade nak dnam te. Kareno o maro ba ite ijai dirai te,tegok das dirai te...Ite akan gagal amen ite lok ijai tun luyen,ite akan tameak saro amen ite idup beak banyang-bayang tun luyen..Dbulen pnuak lem bulen puaso ijai plajaran magea ite untuk sabar,coa putus aso..serto tegea lem berusaho.

قُلْيَا عِبَادِالَّذِينَآمَنُوااتَّقُوارَبَّكُمْلِلَّذِينَأَحْسَنُوافِي هَذِهِالدُّنْيَاحَسَنَةٌوَأَرْضُاللَّهِوَاسِعَةٌإِنَّمَايُوَفَّىالصَّابِرُونَأَجْرَهُمبِغَيْرِحِسَابٍ

“Katakanlah: “Hai hamba-hamba-Ku yang beriman. bertakwalah kepada Tuhanmu”. Orang-orang yang berbuat baik di dunia ini memperoleh kebaikan. Dan bumi Allah itu adalah luas. Sesungguhnya hanya orang-orang yang bersabarlah Yang dicukupkan pahala mereka tanpa batas.”. QS. az-Zumar- Ayat 10.

Pelajaran keduai ade ba,ramadhan majea ite untuk bersikep istiqamah serto ikhlas lem gemrok lakeak untuk maneu kehidupan yo...Pendirian te teguh,coa bubeak-bubeak...ramadhan majea ite untuk teguh pendirian. Kemrejo puaso lem keadaan istiqamah serto ikhlas magea Allah SWT.

Sikep ikhlas lem maneu idup..sikep coa mudeak putus aso,sikep uak kunei keluh kesah,dio tuntutan lem ibadat puaso. Kareno o,lem kemrejo ibadat puaso ite coa buliak mengeluh,kareno sipet mengeluh lem idup ade ba sipet tun coa ikhlas...
Ade lem pepateak tun tuai menea'o madeak. " Keluhan ade ba tando kelemahan jiwo " Puaso Ramdahan majea ite untuk tulus serto ikhlas..uak kunei sipet keluh kesah,untuk jano ite kemrejo amea ibadat puaso amen lem atei te ade asai jengik ngen puaso de kenrejo te...tip bilai mengeluh madeak paeak puaso,mako sipet awei o coa menea jiwo te tameak kuet tapi menea jiwo ijai lemah,kareno keluhan ade ba kato-kato atei coa ikhlas serto uak kunei sipet tulus. Lem hadits nebai Muhammad SAW Bersabda " Dau umatku kemrejo puaso,tapi coa gen dapet jano-jano kecuali nyemen ngen aus " Hadits yo ade kaitan ne ngen sipet coa ikhlas lem kemrejo puaso. Ite samo-samo berlindung magea Allah kunei sipet keluh kesah serto putus aso. Ite berharap Allah SWT selalu mukok matai atei te untuk ijai hamba Allah ikhlas serto beseak dirai.
Coa teraso bi paok malem ke 17 ite puaso,smugo ite kute ne dapet meraih kemenangan...Ade perubahan lem sikep serto tindakan te sudo bulen puaso yo,ite nam ijai lebiak baik igai kunei bulen-bulen de sudo ne...Kute yo harapan te besamo,smuga tercapei...Amiiin.

Dio ba kalimat ne magea ite kute ne die,kinoi te ade manfaat ne..Dau igai pelajaran serto hikmah do dapet ite mok kunei ibadat puaso bulen Ramadhan yo..Bulen pnuak berkah serto ampunan kunei Allah SWT. Barakallahuli Walakum...Wallahu'alam Bisshawab...

H. Anton Sj

Pegong Pokok Nak Lem Agamo Islam

2009-07-26T11:31:00.000-07:00

Nak lem agamo islam seluyen mencegah kemusrikan,ade kulo pegong de harus tun islam taat magea aturan-aturan ne. Antaro ne ade ba tun islam harus percayo ade ne tuhan cuma do,do o ba tuhan Allah swt.,.si harus berimen magea tuhan Allah coa gen tuhan seluyen tuhan Allah coa gen penan bekinoi seluyen tuhan Allah,tuhan Allah tegok suang coa serupo ngan mahluk coa makei stekuk coa makei tidua coa makei matei coa makei lupo. Do o ba tuhan temuan alam semesto yo,coa de gen nam melei mudarat ngan manfaat kecuali atas izin ne. dio ba de perlu ijai pegong tun islam kerno,dio ba pokok tauhid neak lem agamo yo. amen bi benea-benea percayo ade ne tuhan Allah,de menguasai kute alam yo..tun islam de benea -bena beriman cigai igai binai kemrejo uleak uleak kidek igai,.kerno si yakin moi ipe bae si lalu tuhan Allah pasti kemliak si,coa gen penan sbunyen kunoi pngeliak tuhan. Sihinggo tun beriman coa binai igai temingea peritea ne,trus taat & temingea larangan-larangn Allah swt. amen hal yo bi kuet neak lem atei tun islam,mako alamat sadei kecamatan kebupaten bahkan negara ijai aman makamur ngan sentosa. kareno tun islam amen bi benea -benea yakin ngan hal yo..si selalu taat magea Tuhan Allah swt. si coa butuh pujai kunoi manusio si cuma butuh ridho kunoi allah swt. di o ba pokok pertamo neak lem islam.

Sudo o poko keduai ade ba,bahwa tun islam ade pesuruak dio ba malaikat,malaikat yo pesuruak tuhan de paling taat,coa perneak melawen magea periteak tuhan jano igai durhako. malaikat yo ba ijai hamba ngan pesuruak tuhan untuk matur alam rayo ya. baik matur kehidupan manusia maupun matur de luyen ne, Ngan berimen ne tun islam magseak mlaikat yo,temameak keyakinan ne magea zat Allah de paling agung...kerno atas kuaso allah ba alam yo jijai.
Untuk selanjut ne pokok neak lem islam ade ba berimen magea rasul ngan nebai Allah..dio ba pokok ketelau nek lem islamm,umat islam harus yakin ngan percayo magea rasul ngan nebai tenu'un tuhan Allah swt untuk umat manusio neak bumai yo. Ade dau jumlah nebai de harus tun islam meyakini.. cuma de ade neak lem syriat islam cuma 25 nebai ngan rasul. Percayo magea nebai ngan rasul temameak keyakinan magea Allah swt. kareno kasiak sayang tuhan Allah magea manusia si temu'un tukang melei dalen de benea kunoi tuhan tukang temunyuk dalen de luus kunoi tuhan magea manusia ngan ade ne nebai ngan rasul yo ba manusio namen dio dalen de benea ne..ngan dalen de saleak ne. mako coa ite dapet mbayang amen coa tuhan Allah temuun nebai ngan rasul untuk melei petunyuk untuk manusio mako kunoi mena o sapei uyo manusio idup neak lem keadaan jahiliyah.

Nebai ngan rasul de tenu'un Allah swt yo,ade ba min misi ngan visi melalui wahyu tuhan Allah swt magea rasul ngan nebai ne..do ba sariat neak lem agamo islam melalui lisan nebai ngan rasul Allah swt.
Ade kulo pegong de langsung tenu'un tuhan melalui wahyu ne..dio ba kiteb kiteb samawi ( Tu'un berasal kunoi Allah swt )...tun islam dapet periteak kunoi tuhan allah swt untuk berimen magea kiteb kiteb de tenuun Allah swt magea nebai ngan rasul ne. dio ba termasuk pokok neak lem islam ke pat. berimen magea kiteb-kiteb sucai de tenu'un Allah swt magea malaikat ngan nebai pesuruak Allah swt. Antaro kiteb-kiteb de harus tun islam berimen ade ba kiteb zabur,taurat ,injil ngan al-quran. kute kiteb o berasal kunoi tuhan Allah swt. waaupun uyo kiteb zabur,taurat,ngan injil cigai si asli firman tuhan igai...kerno bi nubeak tun yahudi ngan nasrani...cuma ite harus tep berimen magea kiteb2 o..berasal kunoi tuhan Allah swt bel o ne. sedangkan AL-quran coa perneak manusio mubeak ne..dio ba kiteb teraher kunoi tuhanAllah kiteb de paling sucai ijai petunjuk magea manusia denio ngan akhirat..coa de gen kalimat de salea neak lem al-quran. kiteb penutup kute sariat nebai nebai sebelum nebai muhammad saw ...kesucaian ne selalu jenago Allah dewek. coa bakea manusio dapet mubeak kiteb AL-quran. Dio ba pegong idup te denio ngan akhirat.

Selanjut ne,tun islam wajib percayo ngan berimen magea ade ne bilai kiamat..dia ba biso agamo islam magea agamo de luyen neak lem agamo islam ade ne bilai kiamet paset ade ne..coa de gen ragau gok didik. dio dau tuhan Allah temeang neak lem al-quran ngan kulo tameak igai hadits hadits nebai muhammad saw. sehinggo percayo mageak ade ner bilai kiamat ade ba pokok neak lem islam ke lemo.Sedangkan neak lem agamo luyen coa gen keyakinan yo,kalaupun ade bareak neak lem kristen ortodoks dio coa si ijai keyakinan pokok neak lem agamo ne. Tai ne,agamo seluyen islam coa percayo ade ne bilai kiamat. Bilai kiamat ade ba bilai,bahwa kute alam rayo yo ajua. coa de gen de selamat ne,kute ne ajua cecping. cuma zat maha tungea ba coa bakei matei..dio ba Allah swt. percayo akan ade ne bilai kiamat ya,ijai pokok neak lem agamo islam. Mko keyakinan magea bilai kiamat yo,harus benea-benea ade neak lem atei tun islam.
Neak samping tun islam percayo ngan ade ne bilai kiamat yo..tun islam waib kulo berimen magea ade ne takdir de baik ngan takdir de kidek kunoi Allah swt..kereno kute de terjijai neak alam rayo yo atas izin Allah swt. mako wajib magea tun islam berimen nien magea ade ne takdir baik ngan takdir kidek teko ne kunoi tuhan Allah swt. coa de gen nam melei mudarat ngan manfaat kecuali Allah swt. Kkalu tu islam benea-benea yakin magea tekdir baik ngan tekdir kidek kunoi Allah swt

Seandai ne tun islam benea benea berimen magea ke enum pokok neak lem agamo islam yo. mako insya Allah masyarakat ijai amn & coa de gen terjijai uleak uleak kidek...coa de gen tun menea ulek maksiat igai. Kerno si yakin nien neak lem atei ne,bahwa idup manusio yo coa luput kunoi pngeliak tuhan ALLAH SWT. Mudah-mudahan untuk maso teko umat islam khusus ne neak taneak jang,umum ne seluruh indonesia & sluruh denio ade kesadaran neak lem agamo sehinggo tun jang ijai contoh kunoi sukau sukau de luyen...semoga.

Wallahu 'alam bisswab

MECEM-MECEM IMEN

2009-07-26T11:30:00.000-07:00

Neak lem tulisan siket yo,mimbar tun-jang cemubo mbahas masalah imen neak lem Islam.
ite samo-samo kenal neak lem Islam ade ne rukun Imen. imen yo dewek neak lem agamo islam ade tiket-tiket ne. Neak lem kiteb-kiteb turas ( klasik) dau ulama Islam jemlas meyakut masalah imen yo,kerno imen coa ite nam muker dio termasuk pokok lai neak lem agamo te agamo islam.
Adepun tiket imen neak lem Islam paro ulama' magiak tiket imen yo ijai telau tiket,cuma ade igai ulama temameak bahwa imen neak lem islam ade pat bagian.
Antaro ne ade ba :

1. Ade gen ne imen coa betameak coa bkuang,neak lem hal yo khusus mageak paro malaikat. Awei ipe ite namen bahwa imen paro malaikat,coa betamea coa bekuang..malaikat sengajo tuhan Allah cipta untuk senantiaso beribadat & berzikir magea Allah swt,coa makei payeak coa makei bedan bilai-bilai malaikat cuma untuk beribadat magea tuhan Allah swt. Malaikat ade mahluk sucai coa perneak durhako jano igai temtang periteak tuhan Allah bareak iblis.

2. Nomor duai ade gen ne imen selalu betameak coa perneak bekuang,dio ba imen paro nebai ngan rasul Allah swt. nebai ngan rasul Allah yo,imen ne selalu betameak coa perneak bekuang,bilai-bilai paro nebai seluyen semapei sariat untuk umat manusio ade ba beribadat magea Tuhan Alalh swt. Sangat saleak amen ade ungkapan tun madeak ade ne wali coa perlu igai ibadat magea tuhan atau paro ahli tarikat coa perlu igai beribadat magea Allah swt. sedangkan nebai ngan rasul dewek selalu beribadat magea Allah,neak lem sejarah ite samo-samo namen awei ipe ibadat paro nebai ngan rasul utusan Allah swt. nebai muhammad misal ne,trus ibadat magea tuhan Allah kebilai kelmen,bahkan sangat cet nebai Muhammad coa tidua muloi kunoi pelbeak sapei pueng hanyo untuk berzikir. Mako lem hal yo coa masuk akea amen ade tun mengakau si bi sapei tikat lekat lem beragamo islam sehinggo si cigai perlu igai ibadat magea tuhan Allah swt. dio ba tiket imen ke duai,imen ne paro nebai ngan rasul utusan Allah swt.

3. Yang ke telau tiket imen ade ba imen tun islam tetiko betameak tetiko bekuang. Nah,dio ba imen tun islam secaro kesuluruhan. Tetiko imen ne betamea teiko bekuang,ite pek bae misal ne ade tun islam dapat ujian kunoi tuhan Allah swt. misal ne neak lem hal kematei pacok bae neak lem keadaan musibah bareak yo imen ne bekuang. Namun ade kulo imen tun islam ketiko ade musibah ,imen ne tameak kuet kerno si yakin neak waktau musibah bareak o si dapet ujaian kunoi Allah.amen si tep kuet imen ne,mako neak kak belek musibah o ade berkat kunoi Allah swt. Awei o kulo imen tun islam ketiko dapet nikmat kunoi Allah swt. ade de betameak imen ne ade kulo de bkuang imen ne.

4. Kemudian tiket imen terakher ade ba imen de paling temeak,ade ba imen tun de selalu bekuang. dio ba imen tun fasik,tun de coa pecayo nien ade ne sariat kunoi than Allah swt. Jano igai kemrejo ibadat de sudo ade periteak kunoi Allah,masai ade ne tuhan bae si ragau,cuma neak lem identitas ne si mengakau si beragamo islam.
Luyen hal magea tun kafia,tun kafia coa de gen istilah imen magea si. Kerno tun kafia jelas-jelas syirik & coa masai ade ne sariat neak lem agamo islam bahkan si coa tun islam tapi kafia. jelas-jelas uak kunoi dalen de neridoi tuhan Allah swt

Mako neak lem hal yo,tike-tiket imen neak lem islam,ite namen bahwa imen tun islam ade tiko ne tuun ade kulo tiko ne betameak harapan te, imen te an waktau ne betameak didik waktau ne bekuang. mako ngan kemrejo periteak kunoi tuhan Allah sepenuak atei,ite dapet temiket imen te magea tuhan Allah swt. kerno coa ite dapet muker bahwa sariat islam yo de dapet majok ite moi keselamatan idup neak denio ngan idup neak akhirat. semugo...

Wallahu'lam Bisshawab