Pegong Idup Neak Lem Gejolak Zaman

Assalamu'alaikum Warahmatullahi Wabarakatuh...

Pertamo skilai pujai serto syukur kehadirat Allah SWT,shalawat serto salam magea Nebai Muhammad SWT..Smugo ite kute ne selalu lem lindungan Allah..amiin.
Amen ite kemliak akuak alua denio pado saat yo, mukin ite ade tepeker denio memang bi tuai sehinggo dau terjijai grau, tun de benea nangap tun saleak..de saleak nangap tun benea. Aliran-aliran,kelompok dau nien neak sekitar te, neak lem islam dewek dau mecem jenis pemahaman...sehinggo coa ite sadar,dau neak sekiling te singo siap temkem ite tip waktau. Pao kelompok lem islam o sengajo musuak-musuak islam menea ne,supayo islam yo coa bersatu..supayo islam yo begaduak sesamo ne,amen bi awei o mako coa perlu kekuatan untuk melemah islam..dio ba de harus ite waspada saat yo sebenea ne.
Tameak igai gencar ne media-media lem musak namo islam,smorot islam lem sisi de kidek ne...seakan-akan coa gen ketenangan lem islam,coa gen pegong idup lem islam. Sebagian masyarakat te ade de keno ngen berita awei yo.
Ijai uyo,akuakro sikep te lem madep keadaan awei o. Maro ba ite maham serto mendalami agamo te yo,nukok Al-Quran..nukok Hadits nebai,ite maham ne pepadek..serto majea magea anok-anok, supayo ite benea-benea ade pegong lem idup..supayo,imen te tep kuet..Tauhid te tep utuh,ite coa nyep pegong lem madep gejolak denio yo.
Tun tuai harus benea-benea majea anok-anok ne supayo paham ngen agamo,supayo namen pegong idup, jibeak sapei munyau anok-anok lepas bae coa gen arah...kareno amen lepas bae awei o,lai kemungkinan si bakea usak kareno arus zaman awei yo.
Negong agamo,nakei agamo..naham ayat Al-Quran, amen masyarakat te bi awei o InsyaAllah ite coa bakea terombang ambing ngen keadaan awei uyo yo. Ite harus selalu teguh pendirian, jibeak mudeak sileu ngen hok serto jabatan, jibeak sapei gmadai keyakinan te,akidah te cuma kareno hok..Kareno lem islam ite akan selamat denio akhirat, pegong te idup neak denio serto akhirat.
Saat yo do o ba kelemahan te tun jang khusus ne, memang tun te jang coa mudeak gmadai keyakinan, tapi dau tun te coa ngertai ngen agamo yo,masiak dau tun te jang awam ngen pemahaman agamo..Mako ne muloi kunei uyo ite saling kinget menginget magea sanok spasuak te..supayo tep teguh lem pendirian, pegong ngen agamo. Najea pegong idup ngen anok-anok, najea siing Al-Quran serto Hadits magea generasi uai,supayo ite besamo idup lem keadaan aman serto ridho Allah SWT...
Kareno o, maro ba ite besamo-samo megong teguh keyakinan te,.paham hakikat idup neak denio yo,ngertai ngen tuntunan Islam..

Mako, lem kesempatan saat yo..Ite harus selalu idup awei kan beak laut ne, kunyau bioa ne mesin,tapi kan ne coa mesir..awei o ba seharus ne ite,kunyau gejolak zaman,kunyau keadaan lok musak islam dau neak sekeliling te..tapi keyakinan te tep utuh bahkan meniket kareno dau cobaan awei o. Smugo ite kute ne selalu lem bimbingan Allah SWT...sukau te,sanok spasuak te tep teguh pendirian serto pegong teguh ngen periteak serto larangan Allah SWT.

Terimokasiak...

H. Anton-Topos

Petueak Untuk Te Besamo

Uleak lilit dawen iben,bece'ei bakeak ngen tapuk ne. Uleak kelsip neak nangai,kotok bioa neak muaro. Saei kecek bareak iben mlilit junyung, anok kan nemuk kan,lai lem kulam nemuk wen..Mas iso pirok iso,budai baik tun jibeak coa mego. Supayo pacok,rajin ba beguau,supayo lekat nebaik ba budai. Tenem coa ceak,mengapung coa monot,adat kutai samo ite makei,lembago samo ite temuang,de baik samo ite makei de kidek samo ite muang..

____________

Lem cerito banyir maso nebai Nuh, anok ngen ngenyan ne coa lok tmotoa nebai nuh masuk kepea,akhir ne keno azab Allah SWT. Uyo ite kulo keno banyir, banyir lebiak lai kunei bioa igai, banyir arus bebas tanpo batas...arus de benea nangap tun kolot,de saleak nangap tun benea ..Kepea te ade ba tuntunan Agamo..Amen coa teatei demidik keluargo, pacok terjebak lem arus banyir o ite. Do o ba kecek malim ne didik da...

____________

Ite paset ne perneak mbaco lem Al-quran madeak kato2 'Keme' contoh ne :' Sesungguhnya kami telah menciptakan manusia dalam bentuk yang sempurna.' Dio berartai ade keterlibatan makhluk Allah lem penciptaan manusio,lem hal yo paset ne inok bapok. Amen Allah madeak makei kalimat 'Aku' mako dio berartai coa terlibat makhluk Allah de luyen. Smugo bermanfaat magea ite kute ne..

_____________

Neak lem riwayat ne mena'o Imem Al-ghazali betanye ngen murid2 ne. Muridku,menurut udi jano de paling benek neak denio yo.? Dau jawaban murid ne,ade de madeak besai,pitok..serto jawaban luyen. Imem Ghazali madeak,kute jwban udi o benea,tapi sesungguh ne de paling benek neak denio yo ade ba megong amanah. Ijai o,jibeak pernah mabai amanah kreno kute ne o bakea ade pertanggungjawaban neak akhirat siang. Smugo brmnfaat.

______________

Ade riwayat ne cemrito,mena'o Imem al-ghazali waktau bkopoa ngen murid-murid ne. Si betanye ' Murid2 ku..Jano kekiro menurut udi de paling lengan neak denio yo..? Dau jawaban murid2ne,ade de madeak dawen keing,ade kulo madeak kapes serto jawaban2 luyen. Imem Al-ghazali madeak,jawaban udi kute ne benea. Tapi de paling lengan neak denio yo ade ba tmingea semyang lemo waktau.?

______________

H. Anton - Topos

Bersyukur Ade Ba Kucai Idup

Ade neanei te didik die a. Ijai ade lem crito ne mena'o kekek ngen kiong.
Bilai-bilai kiong coa nien as kemliak kekek,sinis bae..tip btemau trus ling kidek..tapi kekek tep bae awei biaso ne,tip btemau si berusaho smapo kiong,temnai kabar..kiong masiak bae coa dulai,jibeak gi miling e kemliak ne bae coa nyut kiong. Smudo ne kekek mraso serbo saleak,neker ne gemne ba kiong awei o ngen si,jano si yo ade saleak atau ade smingung perasaan kiong...
Nmot kekek bilai paling tepat ne,si lok temnai ngen kiong ..gensi saleak ne sapei kiong awei o ngen si. Akhir ne skitar jam 9 pueng,kekek magea kiong..Nadeak kekek,kiong..ite bi an idup neak daerah yo,tapi gemne ko trus sinis bae kemliak uku..jano ade uku menea saleak ngen ko atau ade uku smingung perasaan nu...? amen ade awei o uku lok minoi maaf,uku ijai serbo saleak ngen sikep nu awei o kiong nadeak kekek. Miuk kekek awei o,kiong lajau ba madeak..sebenea ne ko coa gen saleak kekek tapi uku meraso iri kemliak ko,ko ade kekea pat nam mlupat mini minoi ne,nam melwen. Sementaro uku,kliak ba..neak kdongku yo..coa ku namen gen jano si ban kebnek yo trus ade neak kdongku..lok te paneu benek asai ne. Miuk nadeak kiong yo kekek muloi namen masalah ne,gemne selamo yo kiong coa nien as kemliak kekek...
Nadeak kekek ngen kiong,sebenea ne ko saleak da kiong,ko cuma kemliak de baik ne bae geak ku,ko coa perneak kemliak kidek ne..ijai ko mangap ko trus kuang,padahal ite yo sesamo ade kuang ade kulo lebiak ne. Ati ngut sudo kekek madeak io,sapei sekep smimar kekek yo...sementaro kiong paneu coa sekep dulai ige,coa si upan ne.
Sejak peritiwa o,muloi kiong sadar..amen trus mukua awok ngen bayang-bayang tun,mako idup yo ijai spit..selalu mangap coa mampu,smudo ne ijai penyakit atei.
Nah,dio sekedar crito bnatang bae da..Ite lok mok hikmah kunei crito yo,jibeak selalu mangap ite coa mampu,sehinggo amen awei o bilai-bilai te trus ngen sipet pesimis,coa mudeak maju..minder trus,akhir ne ijai sipet kidek,iri serto dengki ngen tun luyen. Bersyukur ba ngen nikmat nlei Allah SWT ngen ite,gnuno ba nikmat o untuk menea uleak baik sesamo manusio,kute ite ade kuang ade kulo lebiak ne..tingea ite lok bersyukur jano coa ne. Smugo bermanfaat...

H. Anton-Topos