Syair Untuk Kaumku

Topos yang jelita,disanalah cakrawala sejati menempah hidup ini...
Di kelilingi pegunugan membentuk cadas kokoh pagar diri...
Hati yang terbesit anyaman mustika sakti untuk menjelajah pelosok negeri...
Airmu yang jernih,mendulang diri dalam ayunan tanah sakti...

Sejatinya engkau telah berumur,tapi sungguh bagi kaumku engkau masih muda dan gagah..
Topos yang anggun,akankah namamu sanggup aku pikul untuk mendaki..
Di sela ancaman angkara murka dengan lidah penuh luka menyelimuti mayapada ini..
Topos yang jelita,katakan padaku apakah bunyi gaduh di luar sana ? apakah bunyi lebah menuang madu,atau bunyi manusia berebut kepalsuan..?
Dalam nasehatmu yang menjulang tinggi,sepatutnya takku hiraukan gemuruh itu..
Yahu yahu ketibin merak Allah,mauri Muhammad dalam Rasulullah..Tunggu nabi dayatullah lang gemilang cahayo Allah...
Tegaklah kaumku pada kebenaran dalam kalimah Laa ilahaillalah...

Cairo,Mesir - 2012

H Anton Sj

Puaso Ramadhan & Skula Idup

Bulen puaso ade ba madrasah,skula pnan te belajea dau hal tentang kehidupan yo..Supayo ite lebiak siap madep idup,supayo ite ade wawasan,supayo ite nam kemliak uak moi muko,supayo ite coa terjebak lem utung sesaat,tetapi menea krugai lai lem jako panyang.

Jano bae pelajaran dapet ite menea ijai pegong lem kemrejo ibadat puaso bulen Ramadhan yo..
Pertamo ade ba,majea ite ijai tun ulet ngen sabar..Neak lem zaman pnuak persaingan tajem yo,ade tuntutan magea ite untuk trus berusaho serto dorangan sabar lem maneu kehidupan yo.

Kareno zaman yo,ade ba zaman dau pilihan..lok gacang kayo mliut tun,muk hok tun,lok gacang kayo kemrejo hal-hal do nyato nyato haram..Lok dapet kedudukan,kemrejo suep menyuep..zaman dau pilihan,do haram cigai tun dulai igai. Mako oleh kareno o,bulen Ramadhan majea ite untuk sabar,serto tegea lem maneu idup...Lem bulen puaso,upan halal bae ite coa buliak muk,jano igai do haram. Ite saat yo masuk zaman sulit,tapi neak segai luyen ite kemliak,mudeak bae caci milyaran kunei pemriteak untuk hal-hal do coa gen kaitan ne ngen kepentingan masyarakat. Perasaan mengiak,jengik serto muak ngen tindakan pembodohan awei o pasti traso lem atei masyarakat..Ite kemliak uyo tukang maling hok rakyat tameak bae mrajolilo neak negerai te yo,de saleak ijai benea,de benea ijai saleak..Ite idup neak tengeak negrai penuak ngen tun saling sangkliut. Mako lem keadan awei zaman uyo,stabilitas temperatur batin harus benea-benea jnago..Ramadhan majea ite untuk sabar serto tegea lem madep idup yo,kunyau nyemen mlilit tnei..Kunyau aus mcit kagen,amen ati sapei waktau buko..jibeak kemcep upan,jibeak menem bioa...Puaso menea ite mlatih sipet sabar.

Ite yo amen ite lok didik mnung meker,ade ba bangso bi terbiaso ngen idup saro..bi biaso ngen keadaan spit..Ekonomi sulit,maso depan generasi penerus seakan-akan neak biding tpok uyo..tingea mot us ne igai. Kesungguhan lem usaho serto ni'ing ngen sipet sabar,optimis kemliak maso teko..Amen bi awei o,insya Allah dalen brasea ade nak dnam te. Kareno o maro ba ite ijai dirai te,tegok das dirai te...Ite akan gagal amen ite lok ijai tun luyen,ite akan tameak saro amen ite idup beak banyang-bayang tun luyen..Dbulen pnuak lem bulen puaso ijai plajaran magea ite untuk sabar,coa putus aso..serto tegea lem berusaho.

قُلْيَا عِبَادِالَّذِينَآمَنُوااتَّقُوارَبَّكُمْلِلَّذِينَأَحْسَنُوافِي هَذِهِالدُّنْيَاحَسَنَةٌوَأَرْضُاللَّهِوَاسِعَةٌإِنَّمَايُوَفَّىالصَّابِرُونَأَجْرَهُمبِغَيْرِحِسَابٍ

“Katakanlah: “Hai hamba-hamba-Ku yang beriman. bertakwalah kepada Tuhanmu”. Orang-orang yang berbuat baik di dunia ini memperoleh kebaikan. Dan bumi Allah itu adalah luas. Sesungguhnya hanya orang-orang yang bersabarlah Yang dicukupkan pahala mereka tanpa batas.”. QS. az-Zumar- Ayat 10.

Pelajaran keduai ade ba,ramadhan majea ite untuk bersikep istiqamah serto ikhlas lem gemrok lakeak untuk maneu kehidupan yo...Pendirian te teguh,coa bubeak-bubeak...ramadhan majea ite untuk teguh pendirian. Kemrejo puaso lem keadaan istiqamah serto ikhlas magea Allah SWT.

Sikep ikhlas lem maneu idup..sikep coa mudeak putus aso,sikep uak kunei keluh kesah,dio tuntutan lem ibadat puaso. Kareno o,lem kemrejo ibadat puaso ite coa buliak mengeluh,kareno sipet mengeluh lem idup ade ba sipet tun coa ikhlas...
Ade lem pepateak tun tuai menea'o madeak. " Keluhan ade ba tando kelemahan jiwo " Puaso Ramdahan majea ite untuk tulus serto ikhlas..uak kunei sipet keluh kesah,untuk jano ite kemrejo amea ibadat puaso amen lem atei te ade asai jengik ngen puaso de kenrejo te...tip bilai mengeluh madeak paeak puaso,mako sipet awei o coa menea jiwo te tameak kuet tapi menea jiwo ijai lemah,kareno kelehuhan ade ba kato-kato atei coa ikhlas serto uak kunei sipet tulus. Lem hadits nebai Muhammad SAW Bersabda " Dau umatku kemrejo puaso,tapi coa gen dapet jano-jano kecuali nyemen ngen aus " Hadits yo ade kaitan ne ngen sipet coa ikhlas lem kemrejo puaso. Ite samo-samo berlindung magea Allah kunei sipet keluh kesah serto putus aso. Ite berharap Allah SWT selalu mukok matai atei te untuk ijai hamba Allah ikhlas serto beseak dirai.
Coa teraso bi paok malem ke 17 ite puaso,smugo ite kute ne dapet meraih kemenangan...Ade perubahan lem sikep serto tindakan te sudo bulen puaso yo,ite nam ijai lebiak baik igai kunei bulen-bulen de sudo ne...Kute yo harapan te besamo,smuga tercapei...Amiiin.

Dio ba kalimat ne magea ite kute ne die,kinoi te ade manfaat ne..Dau igai pelajaran serto hikmah do dapet ite mok kunei ibadat puaso bulen Ramadhan yo..Bulen pnuak berkah serto ampunan kunei Allah SWT. Barakallahuli Walakum...Wallahu'alam Bisshawab...

 H. Anton - Topos

Cerito Penguet Imen

Ade neanei te didik die a. Ijai ade lem crito ne mena'o kekek ngen kiong.
Bilai-bilai kiong coa nien as kemliak kekek,sinis bae..tip btemau trus ling kidek..tapi kekek tep bae awei biaso ne,tip btemau si berusaho smapo kiong,temnai kabar..kiong masiak bae coa dulai,jibeak gi miling e kemliak ne bae coa nyut kiong. Smudo ne kekek mraso serbo saleak,neker ne gemne ba kiong awei o ngen si,jano si yo ade saleak atau ade smingung perasaan kiong...
Nmot kekek bilai paling tepat ne,si lok temnai ngen kiong ..gensi saleak ne sapei kiong awei o ngen si. Akhir ne skitar jam 9 pueng,kekek magea kiong..Nadeak kekek,kiong..ite bi an idup neak daerah yo,tapi gemne ko trus sinis bae kemliak uku..jano ade uku menea saleak ngen ko atau ade uku smingung perasaan nu...? amen ade awei o uku lok minoi maaf,uku ijai serbo saleak ngen sikep nu awei o kiong nadeak kekek. Miuk kekek awei o,kiong lajau ba madeak..sebenea ne ko coa gen saleak kekek tapi uku meraso iri kemliak ko,ko ade kekea pat nam mlupat mini minoi ne,nam melwen. Sementaro uku,kliak ba..neak kdongku yo..coa ku namen gen jano si ban kebnek yo trus ade neak kdongku..lok te paneu benek asai ne. Miuk nadeak kiong yo kekek muloi namen masalah ne,gemne selamo yo kiong coa nien as kemliak kekek...
Nadeak kekek ngen kiong,sebenea ne ko saleak da kiong,ko cuma kemliak de baik ne bae geak ku,ko coa perneak kemliak kidek ne..ijai ko mangap ko trus kuang,padahal ite yo sesamo ade kuang ade kulo lebiak ne. Ati ngut sudo kekek madeak io,sapei sekep smimar kekek yo...sementaro kiong paneu coa sekep dulai ige,coa si upan ne.
Sejak peritiwa o,muloi kiong sadar..amen trus mukua awok ngen bayang-bayang luyen,mako idup yo ijai spit..selalu mangap coa mampu,smudo ne ijai penyakit atei.
Nah,dio sekedar crito bnatang bae da..Ite lok mok hikmah kunei crito yo,jibeak selalu mangap ite coa mampu,sehinggo amen awei o bilai-bilai te trus ngen sipet pesimis,coa mudeak maju..minder trus,akhir ne ijai sipet kidek,iri serto dengki ngen tun luyen. Bersyukur ba ngen nikmat nlei Allah SWT ngen ite,gnuno ba nikmat o untuk menea uleak baik sesamo manusio,kute ite ade kuang ade kulo lebiak ne..tingea ite lok bersyukur jano coa ne. Smugo bermanfaat...

H. Anton-Topos